ئەنقەرەدە خىتاينىڭ جىنايەتلىرى كۈنتەرتىپكە كەلتۈرۈلگەن مۇھىم يىغىن ئۆتكۈزۈلدى

ئەنقەرە ئىجتىمائىي پەنلەر ئۇنىۋېرسىتېتىدا «ئۇيغۇرلارنى مەجبۇرىي ئەمگەككە سېلىش: يەر شارى تەمىنات زەنجىرىگە تەسىرى ۋە تۈركىيە  ئۈچۈن يۈز بېرىشى مۇمكىن بولغان خەتەرلەر» تېمىلىق يىغىن ئۆتكۈزۈلدى.

28-نويابىر ئۆتكۈزۈلگەن مەزكۇر يىغىن شەرقىي تۈركىستان ئىنسان ھەقلىرىنى كۆزىتىش جەمئىيىتى تەرىپىدىن ئەنقەرە ئىجتىمائىي پەنلەر ئۇنىۋېرسىتېتىدا ئۆتكۈزۈلگەن بولۇپ، يىغىنغا تۈركىيە پارلامېنت ئەزالىرىدىن يېڭى يول پارتىيەسى پارلامېنت ئەزاسى ئىدرىس شاھىن، ئادالەت ۋە تەرەققىيات پارتىيەسى ئىستانبۇل پارلامېنت ئەزاسى ئادەم يىلدىرىم، كېلەچەك پارتىيەسى مۇئاۋىن رەئىسى ۋە پارلامېنت ئەزاسى دوكتور سەلچۇق ئۆزداغ، شەرقىي تۈركىستان ئۆلىمالار بىرلىكى رەئىسى دوتسېنت دوكتور ئالىمجان بۇغدا، شەرقىي تۈركىستان مائارىپ ۋە ھەمكارلىق جەمئىيىتى رەئىسى مۇساجان ئەر قاتارلىقلاردىن باشقا، كۆپلىگەن ئاممىۋى تەشكىلات رەئىسلىرى، ئاكادېمىكلار ۋە پائالىيەتچىلەر قاتناشتى.

يىغىندا خىتاينىڭ شەرقىي تۈركىستاندا ئىجرا قىلىۋاتقان ئىنسانىي ھوقۇق دەپسەندىچىلىكى، بولۇپمۇ ئۇيغۇرلارغا قارشى ئىجرا قىلىۋاتقان مەجبۇرىي ئەمگەك جىنايەتلىرى، تۈرلۈك مۇھىم ساھەلەر ئارقىلىق يەر شارى تەمىنلەش زەنجىرىگە قانداق تەسىر كۆرسىتىۋاتقانلىقى، بۇ جىنايەتلەرنىڭ ھەممىسىنىڭ ئىرقىي قىرغىنچىلىق بىلەن ماس قەدەمدە ئىجرا قىلىنىۋاتقانلىقى ۋە بۇلارنىڭ تۈركىيەگە ئەخلاقىي ۋە ئىقتىسادىي جەھەتتىن كەلتۈرۈپ چىقىرىدىغان خەتەرلىرىمۇ تەپسىلىي ئوتتۇرىغا قويۇلدى ۋە تۈركىيەدىكى نۆۋەتتىكى تۈزۈملەردىن پايدىلىنىپ تۇرۇپ مەنبە تەكشۈرۈشنى كۈچەيتىشتىن باشلاپ قىلىشقا تېگىشلىك مۇھىم تەكلىپلەر ئوتتۇرىغا قويۇلدى.

يىغىندا يەنە ئۇيغۇرلار نۆۋەتتە باشتىن كەچۈرۈۋاتقان ئىرقىي قىرغىنچىلىق، مەجبۇرىي ئەمگەككە سېلىنىش قاتارلىق جىنايەتلەرنى توختىتىشنىڭ پەقەت شەرقىي تۈركىستان مەسىلىسىنىڭ ھەل قىلىنىشى، ئىشغالىيەتنىڭ ئاخىرلىشىشى بىلەن ئەمەلگە ئاشىدىغانلىقى، ئەركىنلىك ۋە مۇستەقىللىق يولىدا كۈرەش قىلىشنىڭ ئۇيغۇرلارغا نىسبەتەن پەقەت بىر ۋەزىپە ئەمەس، ئوخشاشلا مىللىي، دىنىي ۋە تارىخىي بىر مەسئۇلىيەت ئىكەنلىكى ئوتتۇرىغا قويۇلدى ۋە: «شەرقىي تۈركىستان بىر كۈنى چوقۇم مۇستەقىل بولىدۇ. بىز بۇنىڭغا ئىشىنىمىز ۋە شۇنىڭ ئۈچۈن كۈرەش قىلىۋاتىمىز» دېگەنلەر تەكىتلەندى.

تەييارلىغۇچى: ئى. ئۆتكۈر