ئىستانبۇلدىكى يازغۇچىلار ئۇچرىشىشىدا ئۇيغۇرلارنىڭ پاجىئەلىك ئەھۋالى ئوتتۇرىغا قويۇلدى

26-نويابىر ئىستانبۇلنىڭ سۇلتانغازى رايونىدا «ANADOLU MEKTEBİ يازغۇچىلار مۇتالىئەسى» يىغىنى ئۆتكۈزۈلگەن بولۇپ، «بوزقىرنىڭ دانىشمەن قەلىمى-چىڭغىز ئايتماتوف» تېمىسىدا مەرھۇمنىڭ ھاياتى، تۆھپىلىرىنى خاتىرىلەش يىغىنى ئۆتكۈزۈلدى.

يىغىنغا تۈرك دۇنياسىدىكى يازغۇچى، شائىرلار قاتناشقان بولۇپ، سۇلتانغازى شەھەرلىك مائارىپ مۇدىرى نەجاتى تەكباش، «تۈرك ئەدەبىياتى ژۇرنىلى» نەشر ئىشلىرى باشلىقى ئىمدات ئاۋشار ۋە دۇنيا ئۇيغۇر يازغۇچىلار ئۇيۇشمىسى رەئىسى مەھمۇتجان ياسىن قاتارلىقلار ئايرىم-ئايرىم سۆز قىلدى.

مەھمۇتجان ياسىن ئۇيغۇر ئەدىبلىرىگە ۋاكالىتەن قىلغان سۆزىدە ئايتماتوفقا باغلاپ تۇرۇپ، 20-ئەسىر تۈركىستان ئەدەبىياتىدىكى شائىر - يازغۇچىلارنىڭ يېقىن بىر جۇغراپىيەۋى ۋە مەدەنىيەت مۇھىتىدا ئىككى خىل (قىزىل خىتاي ۋە قىزىل رۇس) سىياسىي كۈچىنىڭ زۇلمى ۋە بېسىمى ئاستىدا ئىجادىيەت بىلەن شۇغۇللانغانلىقىنى، مۇتلەق كۆپ قەلەمكەشلەرنىڭ شېھىت قىلىنغانلىقى، تۈرمىلەرگە تاشلانغانلىقى، جىسمانىي ۋە مەنىۋى ئىسكەنجىگە ئېلىنغانلىقىنى، ئىجادىيەتتە ئەركىنلىك مۇھىتىدىن ئايرىلىپ قالغانلىقلىرىنى بايان قىلدى.

ئۇ سۆزىنىڭ ئاخىرىدا شەرقىي تۈركىستاندا 2017 - يىلىدىن كېيىن 380 دىن ئارتۇق يازغۇچى، شائىر، مۇخبىرنىڭ تۈرمە ۋە جازا لاگېرىغا تاشلانغانلىقىنى، ئۇيغۇر ئەدەبىياتنىڭ تارىختا كۆرۈلمىگەن تۇرغۇنلۇققا كىرگەنلىكىنى، خىتاي رېجىمىنىڭ ئۇيغۇر خەلقىنى پۈتۈن بىر مىللەت سۈپىتىدە خۇددى ئايتماتوف «ئەسىردىن ھالقىغان بىر كۈن» رومانىدا يازغان «ماڭقۇرت» تىپىغا ئايلاندۇرۇشقا مەجبۇرلاۋاتقانلىقىنى سۆزلەپ، تۈرك دۇنياسىنىڭ ئۇيغۇر مىللىتىگە ۋە ئەدەبىياتىغا ئىگە چىقىشىنىڭ، نەزەرىنى ئاغدۇرىشىنىڭ ھەم ئىنسانلىق، ھەم مىللىي، ھەم قېرىنداشلىق مەجبۇرىيىتى ئىكەنلىكىنى تەكىتلەپ، ئۇيغۇرلارغا ۋە ئۇيغۇر قەلەمكەشلەرگە ئەركىنلىك تىلەپ سۆزىنى ئاخىرلssاشتۇردى.

تەييارلىغۇچى: ئى. ئۆتكۈر