خىتاي ۋىرۇس باھانىسى بىلەن غۇلجىنى قامال قىلدى

خىتاي يىللاردىن بىرى شەرقىي تۈركىستان خەلقىنى سىرتقى مۇھىتتىن ئايرىپ كونترول قىلىپ كەلگەن بولۇپ، يىللاردىن بىرى ئاتالمىش «تېررورلۇققا زەربە بېرىش» نامىدا باستۇرۇپ كەلگەن بولسا، يېقىنقى يىللاردا خىتاي ۋىرۇسنىڭ دۇنياغا تارقىلىشى بىلەن خىتايغا نىسبەتەن شەرقىي تۈركىستان خەلقىنى قامال قىلىش ئۈچۈن يەنە بىر باھانە تېپىلدى ۋە ئاتالمىش «ۋىرۇستىن مۇداپىئەلىنىش» باھانىسى بىلەن تېخىمۇ قاتتىق قامال قىلماقتا.

تەڭرىتاغ تورىنىڭ 2-ئاۋغۇستتىكى خەۋىرىدە بىلدۈرۈلۈشىچە، شەرقىي تۈركىستاندىكى ئىلى قازاق ئاپتونوم ئوبلاستلىق يۇقۇمنىڭ ئالدىنى ئېلىش-تىزگىنلەش خىزمىتى قوماندانلىق ئىشتابىنىڭ ئاشكارىلىشىچە، دائىرىلەر ئاتالمىش «يۇقۇمنىڭ ئالدىنى ئېلىش-تىزگىنلەشتىكى تۈرلۈك تەدبىرلەرنى دەل جايىدا ئەمەلىيلەشتۈرۈش» نامىدا غۇلجا خەلقىنى قاتتىق قامال قىلغان. قامال قىلىش تەدبىرى غۇلجىغا كىرگەنلەرلا ئەمەس بەلكى غۇلجىدىن سىرتقا چىققان كىشىلەرنىمۇ ئۆز ئىچىگە ئالغان.

دائىرىلەر يېقىندا غۇلجىدىن ئايرىلىدىغان خەلقنى تۆمۈريول، ئايرودۇرۇم، تاشيول يولۇچىلار بېكىتى ۋە تاشيول تەكشۈرۈش ئېغىزلىرىدا بەدەن تېمپېراتۇرىسىنى ئۆلچەشكە مەجبۇرلىغان. ھەم سىرتقا چىقماقچى بولغانلاردا  24 سائەت بۇرۇنقى ساغلاملىق تەكشۈرۈش ئىسپاتى، ساغلاملىق يېشىل كود ۋە خەۋەرلىشىش چوڭ سانلىق مەلۇمات مۇساپە كارتىسى قاتارلىق رەسمىيەتلەرنىڭ بولۇشىنى تەلەپ قىلغان.

ئۇندىن باشقا غۇلجىدىن ئايرىلغانلار بارماقچى بولغان مەنزىلگە يېتىپ بارغاندىن كېيىنمۇ تەۋەلىكتىكى ئاتالمىش «يۇقۇمنىڭ ئالدىنى ئېلىش-تىزگىنلەش» باھانىسى بىلەن ئوتتۇرىغا چىقارغان قامال قىلىش تەدبىرلىرىگە ماسلىشىشى كېرەك ئىكەن.

 

تەييارلىغۇچى: ئابدۇخەبەر رەجەپ

بۇ خەۋەر 510 قېتىم كۆرۈلدى
03/08/2022 12:44:00
ئىنكاسلار
ئىنكاس يزىڭ
0 بۇ خەۋەرگە ئىنكاس يوق