قاتاردىكى مەشھۇر پۇتبول مەيدانىنى سالغان شىركەتنىڭ شەرقىي تۈركىستاندا لاگېر ياسىغانلىقى ئاشكارىلاندى

قاتاردا ئۆتكۈزۈلۈۋاتقان دۇنيا لوڭقىسى پۇتبول مۇسابىقىسىنىڭ ھەل قىلغۇچ مۇسابىقىسى ئوينىلىدىغان پۇتبول مەيدانىنى سالغان شىركەتلەر ئارىسىدا شەرقىي تۈركسىتاندا ئۇيغۇرلارنى كەڭ كۆلەمدە تۇتۇپ تۇرۇش ۋە قىرغىن قىلىش ئۈچۈن قۇرۇلغان جازا لاگېرلىرى قۇرۇلۇشىدىمۇ مۇھىم خىزمەت خىتاي شىركىتى بارلىقى ئاشكارىلاندى.

دوھادىكى ھەل قىلغۇچ مۇسابىقە ئوينىلىدىغان لۇسايىل پۇتبول مەيدانىنى قۇرغان شىركەت خىتاي تۆمۈر يول قۇرۇلۇش شىركىتى بولۇپ، ئۇنىڭ شەرقىي تۈركىستاندا ئاتالمىش تەربىيلەش مەركىزى نامىدا سېلىنغان جازا لاگېرلىرى قۇرۇلۇشىدا ئاساسلىق رول ئوينىغۇچى ئىكەنلىكى ئاشكارىلاندى. 

«تايمىس گېزىتى» نىڭ بۈگۈنكى خەۋىرىدە بىلدۈرۈلۈشچە، قاتار 2022-يىللىق دۇنيا لوڭقىسى ھەل قىلغۇچ مۇسابىقىسىنىڭ مەيدانىنى قۇرۇشنى ھۆددىگە ئالغان شىركەتنىڭ خىتاينىڭ شەرقىي تۈركىستاندىكى ئۇيغۇرلارنى كەڭ كۆلەمدە تۇتۇپ تۇرۇشتا ئىشلىتىلىدىغان تۈرمە قۇرۇشتا باش رولچى ئىكەنلىكى ئېنىقلانغان. 

ھۆججەتلەردە كۆرسىتىلىشچە، خىتاي تۆمۈر يول قۇرۇلۇش شىركىتى (CRCC) قاتار بىلەن ھەمكارلىشىپ، دوھادىكى دۇنيا لوڭقىسى ھەل قىلغۇچ مۇسابىقە ئوينىلىدىغان لۇسايىل پۇتبول مەيدانىنى ياساشتا ھەمكارلاشقان بولۇپ، مەزكۇر شىركەت ئىلگىرى ئاتالمىش شىنجاڭ ئىشلەپچىقىرىش ۋە قۇرۇلۇش دىۋىزىيىسى يەنى بىڭتۈن ئۈچۈن ئىشلىگەن.

دىۋىزىيە خىتاينىڭ ھۆكۈمەت ئورگىنى بولۇپ، خىتاي ئارمىيىسى بىلەن بىۋاسىتە ئالاقىسى بار بۇ ئورگان خىتاينىڭ شەرقىي تۈركىستاندىكى كىشىلىك ھوقۇق دەپسەندىچىلىكىگە كەڭ كۆلەمدە ھەسسە قوشقان. 

دوھادىكى 80،000 تاماشىبىن سىغىملىق ئالتۇن قاچا شەكىللىك لۇسايىل پۇتبول مەيدانى سېر نورمان فوستېرنى ئۆز ئىچىگە ئالغان «Foster + Partners» فوستېر ۋە ئۇنىڭ شېرىكلىرىدىن تەشكىللەنگەن بىر گۇرۇپپا تەرىپىدىن لايىھەلەنگەن بولۇپ، ھەل قىلغۇچ مۇسابىقە ئۈچۈن ئالاھىدە ياسالغان ۋە 18-دېكابىر ھەل قىلغۇچ مۇسابىقە بۇ مەيداندا ئۆتكۈزۈلىدۇ. 

شەرقىي تۈركىستاندىكى جىنايەتلىرى سەۋەبلىك ئامېرىكىنىڭ جازا تىزىملىكىگە كىرگۈزۈلگەن ئاتالمىش شىنجاڭ ئىشلەپچىقىرىش ۋە قۇرۇلۇش ئەترىتى ئۆتكەن يىلى مارتتا، ياۋروپا ئىتتىپاقىنىڭمۇ جازالاش تىزىملىكىگە كىرگۈزۈلگەنىدى. 

بارلىق جىنايەتلىرىگە كۆز يۇمۇپ تۇرۇۋالغان خىتاي رېجىمىنىڭ بۇ ھەپتە قاتارغا ئىككى مۈشۈك ئېيىق سوۋغا قىلىشى ۋە ئۇنىڭ ئوتتۇرا شەرقتە بىرىنچى بولۇپ خىتاينىڭ سوۋغىسى سۈپىتىدە قوبۇل قىلىنىشى، مۇتەخەسسىسلەر تەرىپىدىن خىتاينىڭ «مۈشۈك ئېيىق دىپلوماتىيىسى» نى قوللانغانلىقىدۇر دەپ  تەنقىدلەندى.

تۆت ياشلىق «سۇھەيل» ۋە ئۈچ ياشلىق «تۇرايا» كەلگۈسى 15  يىل ئىچىدە قاتاردا تۇرىدىغان بولۇپ، ئۇلارغا ھازىرلانغان يەر ئۇلارنىڭ خىتاينىڭ سىچۈەندىكى تەبىئىي ماكانىغا تەقلىد قىلىنغان.

خىتاينىڭ قاتاردىكى باش ئەلچىسى جوۋ جيەن تىۋىتتىردا سىن ھەمبەھىرلەپ، خىتاي - قاتار مۇناسىۋىتىنى ماختىدى ۋە بۇ سوۋغاتنىڭ ئۇلارنىڭ ئىتتىپاقلىقىنىڭ چوڭقۇرلۇقىغا سىمۋول قىلىنغانلىقىنى ئېيتتى.

باش ئەلچى بۈگۈن يەنە خىتاينىڭ قاتار دۇنيا لوڭقىسى پۇتبول مۇسابىقىسىگە قوشقان تۆھپىسىنى گەۋدىلەندۈرۈپ: «خىتاي ئېلېمېنتلىرى ئىنتايىن گەۋدىلىك. ئۇل ئەسلىھەدىن تېلېگرافقىچە، 1500 يېڭى ئېنېرگىيە ئاپتوبۇسىدىن قۇياش ئېلېكتر ئىستانسىسىغىچە، مۇسابىقە تەمىناتىدىن خاتىرە بۇيۇملارغىچە «خىتايدا ئىشلەنگەن» بۇنى قاتارنىڭ ھەممە يېرىدە ئۇچراتقىلى بولىدۇ» دەپ كۆرەڭلىدى. 

لوندون ئۇچۇر مۇلازىمەت شىركىتى GlobalData نىڭ خەۋىرىگە قارىغاندا، ساھىبخان دۆلەت 12 يىل جەريانىدا يول، مېھمانخانا، تەنتەربىيە مەيدانى ۋە پۇتبول ئەسلىھەلىرىنى ياساشتا 200 مىليارد دوللاردىن ئارتۇق پۇل خەجلىگەن بولۇپ، خىتاي شىركەتلىرى 2022-يىللىق دۇنيا لوڭقىسى پۇتبول مۇسابىقىسىدە باشقا ھەرقانداق دۆلەتنىڭ سالغان مەبلىغىدىن كۆپرەك مەبلەغ سالغان بولۇپ، مۇسابىقىنىڭ رەسمىي ئەقلىفونى، مۇسابىقىنى دۇنيا مىقياسىدا تارقىتىش ۋە رەسمىي تاۋار ئىشلەپچىقىرىش ۋە بۇ يىللىق لوڭقىنى كۆپەيتىش، مۇسابىقىنىڭ رەسمىي ماسكىسى، بايراقلارنىڭ ئىشلەپچىقىرىلىشى قاتارلىق پۈتۈن ئىشلارنىڭ خىتاينىڭ قولىدا بولۇپ، خىتاي بۇنىڭدىن غايەت زور كىرىمگە ئېرىشكەن. 

 

تەييارلىغۇچى: ئى. ئۆتكۈر

بۇ خەۋەر 512 قېتىم كۆرۈلدى
22/11/2022 17:48:00
ئىنكاسلار
ئىنكاس يزىڭ
0 بۇ خەۋەرگە ئىنكاس يوق