خىتاي مۇخبىرنىڭ رۇسىيەدە ئۇكرائىنانىڭ ھۇجۇمىغا ئۇچرىغانلىقى ئىلگىرى سۈرۈلدى

خىتاينىڭ بىر مۇخبىرى رۇسىيەنىڭ كۇرسك رايونىنى زىيارەت قىلىش، سۈرەتكە ئېلىش جەريانىدا ئۇكرائىنا ئارمىيەسىنىڭ ئۇچقۇچىسىز ھاۋا ئاپپاراتىنىڭ ھۇجۇمىغا ئۇچراپ، باش قىسمى يارىلانغان.

ئالاقىدار خەۋەرلەردىن مەلۇم بولۇشىچە، ئۇكرائىنانىڭ ئۇچقۇچىسىز ھاۋا ئاپپاراتى 26-ئىيۇن رۇسىيەنىڭ كۇرسك رايونىدىكى كورېنېۋو يېزىسىغا ھۇجۇم قىلغان. ئەينى ۋاقىتتا خىتاي سۇمۇرۇغ تېلېۋىزىيە قانىلىنىڭ لۇ يۈگۇاڭ ئىسىملىك مۇخبىرى ۋە ئۇنىڭ گۇرۇپپىسى ھۇجۇم رايونىدا زىيارەت قىلىۋاتقان بولۇپ، خىتاي مۇخبىرى ھۇجۇمغا ئۇچراپ باش قىسمى يارىلانغان ۋە دوختۇرخانىغا ئېلىپ بېرىلغان.

رۇسىيە تاشقى ئىشلار مىنىستىرلىقى بۇ ۋەقەنى «تېررورلۇق ھۇجۇمى» دەپ ئاتىغان بولۇپ،  ئۇكرائىنا ھۆكۈمىتىنى ھەربىي ھەرىكەت ئارقىلىق ئاخبارات خادىملىرىنى باستۇرۇشقا ئۇرۇندى، دەپ ئەيىبلىگەن.

نۆۋەتتە رويتېرس ئاگېنتلىقى بۇ خەۋەرنى مۇستەقىل دەلىللىيەلمىگەنلىكىنى بىلدۈرگەن. ئۇكرائىنا تاشقى ئىشلار مىنىستىرلىقى ۋە پىرېزىدېنت زېلېنسكىينىڭ ئىشخانىسى بۇ ھەقتە ئىپادە بىلدۈرمىگەن.

خىتاي تاشقى ئىشلار مىنىستىرلىقى باياناتچىسى گو جياكۈن تۈنۈگۈنكى قەرەللىك ئاخبارات يىغىنىدا بۇ ھەقتىكى سوئالغا جاۋاب بېرىپ، خىتاي مۇخبىرنىڭ يارىلانغانلىقىغا ئالاھىدە كۆڭۈل بۆلىدىغانلىقىنى، خىتاينىڭ ھەر قايسى تەرەپلەرنى ئۇكرائىنا كىرىزىسىنى سىياسىي يول ئارقىلىق ھەل قىلىشقا چاقىرىدىغانلىقىنى دەۋا قىلدى.

گەرچە خىتاي ئۇكرائىنا-رۇسىيە ئۇرۇشىدا بىتەرەپ مەيداندا ئىكەنلىكىنى دەۋا قىلىپ كەلگەن بولسىمۇ، تۈرلۈك ساھەلەردىكى مەخپىي ئالاقىسى، ھەمكارلىقى، ياردەملىرى ئىزچىل داۋاملاشماقتا ۋە قەدەممۇ قەدەم ئاشكارىلانماقتا.

ئۇكرائىنا تاراتقۇلىرى بىر نەچچە كۈن بۇرۇنقى خەۋىرىدە رۇسىيە ھەربىي بازىلىرىنىڭ بۇ يىل ئىچىدە تەخمىنەن 600 خىتاي ئەسكىرىنى قوبۇل قىلىپ، مەشىقلەندۈرىدىغانلىقىنى خەۋەر قىلغانىدى. مەزكۇر خەۋەردە ئۇكرائىنا مۇداپىئە مىنىستىرلىقىنىڭ ئىستىخبارات ئىدارىسىدىكى ئۇچۇرلار مەنبە قىلىنغانىدى. خىتاي تاشقى ئىشلار مىنىستىرلىقى باياناتچىسى بولسا بۇ ئەھۋالدىن خەۋىرى يوق ئىكەنلىكىنى ئېيتىپ، جاۋاب بېرىشتىن ئۆزىنى قاچۇرغانىدى.

بۇنىڭدىن ئىلگىرى يەنە ئۇكرائىنا ھۆكۈمىتى خىتاي ئەسكەرلىرىنىڭ رۇسىيە ئۈچۈن ئۇرۇشقا قاتناشقانلىقىنى، خىتاينىڭ رۇسىيەنى ھەربىي ئەشيا، زاپچاس ۋە ئىلغار تېخنىكىلار بىلەن تەمىنلىگەنلىكىنى ئارقىمۇ ئارقا ئاشكارىلاپ، خىتاينى قاتتىق ئەيىبلىگەنىدى. خىتاي بولسا بۇلارنى پۈتۈنلەي ئىنكار قىلغانىدى.