دەريا يانىق: قېرىنداشلىرىمىزنىڭ يېنىدا تۇرۇشنى داۋاملاشتۇرىمىز

شەرقىي تۈركىستان ئىنسان ھەقلىرىنى كۆزىتىش جەمئىيىتىدىن بىر ھەيئەت 25-ئاۋغۇست تۈركىيە پارلامېنتى ئىنسان ھەقلىرى كومىتېتىنىڭ رەئىسى دەريا يانىق خانىمنى زىيارەت قىلىپ، شەرقىي تۈركىستان مەسىلىسى ھەققىدە سۆھبەتلەشتى.

شەرقىي تۈركىستان ئىنسان ھەقلىرىنى كۆزىتىش جەمئىيىتى رەئىس ۋەكىلى ئابدۇرېشىد ئەمىنھاجى ۋە جەمئىيەتنىڭ ئىدارە ھەيئەت ئەزاسى ئىبراھىم سىدىقتىن تەشكىللەنگەن ھەيئەت دۈشەنبە كۈنى تۈركىيە پارلامېنتى ئىنسان ھەقلىرى كومىتېتىنىڭ رەئىسى، شۇنداقلا ئادالەت ۋە تەرەققىيات پارتىيەسىنىڭ پارلامېنت ئەزاسى دەريا يانىق خانىمنى زىيارەت قىلدى. دەريا يانىق خانىم ئۇلارنى پارلامېنت بىناسىدا كۈتۈۋالدى.

دەريا يانىق خانىم ئىجتىمائىي تاراتقۇ ھېسابىدا بۇ توغرۇلۇق ئۇچۇر ھەمبەھرىلەپ، ئىنسان ھەقلىرىنى كۆزىتىش جەمئىيىتى بىلەن ئىنسانىي قەدىر-قىممەت ۋە تۈپ ھوقۇقلارنى، بولۇپمۇ شەرقىي تۈركىستان خەلقىنىڭ ھوقۇقىنى قوغداش توغرىسىدا ئىنتايىن مۇھىم يىغىن ئاچقانلىقىنى تەكىتلىدى.

ئۇ يازمىسىدا: «بۇ ساھەدىكى ئاممىۋى تەشكىلاتلىرىمىزنىڭ تىرىشچانلىقى دۆلىتىمىز ۋە قېرىنداش تۇپراقلىرىمىز ئۈچۈن ئىنتايىن مۇھىم. تۈركىيە پارلامېنتى ئىنسان ھەقلىرى كومىتېتى بولۇش سۈپىتىمىز بىلەن، شەرقىي تۈركىستان ئىنسان ھەقلىرىنى كۆزىتىش جەمئىيىتىنىڭ خىزمەتلىرىنى يېقىندىن كۆزىتىۋاتىمىز. بىز ھەر پۇرسەت ۋە شارائىتتا قېرىنداش مىللەتلىرىمىزنىڭ يېنىدا تۇرۇشنى، قوللىشىمىزنى ئەڭ كۈچلۈك تەرىقىدە ئوتتۇرىغا چىقىرىشنى داۋاملاشتۇرىمىز» دېگەنلەرنى قەيت قىلدى.

دەريا يانىق خانىم بۇندىن ئىلگىرىمۇ شەرقىي تۈركىستاندا ئىنسان ھەقلىرى دەپسەندىچىلىكىنىڭ داۋاملىشىۋاتقانلىقىنى، ئۇيغۇرلارنىڭ تۈپ ھوقۇقلىرىدىن مەھرۇم ھالدا ياشاۋاتقانلىقىنى كۆپ قېتىم تىلغا ئالغانىدى.