تىرامپ خىتايغا %200 باج قويۇش بىلەن تەھدىت سالدى

ئامېرىكا پىرېزىدېنتى دونالد تىرامپ خىتاينىڭ ئامېرىكىغا ماگنىت ئېكسپورتىنى تېزلىتىشى كېرەكلىكىنى، ئۇنداق قىلمىسا 200 پىرسەنتلىك تاموژنا بېجى ياكى شۇنىڭغا ئوخشاش بىر تەدبىر قوللىنىشىغا مەجبۇر بولىدىغانلىقىنى بىلدۈردى.

بىلومبېرگ ئاگېنتلىقىنىڭ خەۋىرىدە بىلدۈرۈلۈشىچە، تىرامپ كورىيە پىرېزىدېنتى لى جې مىيۇڭنى ئاقسارايدا كۈتۈۋالغان بولۇپ، مەزكۇر كۆرۈشتە تاراتقۇلارغا خىتايغا مۇناسىۋەتلىك ئىپادىلەرنى بىلدۈرگەن.

تىرامپ ئامېرىكىنىڭ خىتاي بىلەن ئىقتىسادىي جەھەتتىن بۇرۇنقىدىنمۇ ياخشى مۇناسىۋەتتە ئىكەنلىكىنى بىلدۈرۈپ، خىتاينىڭ ئاقىلانە ھەرىكەت قىلىۋاتقانلىقىنى ۋە دۇنيا ماگنىت زاپىسىنىڭ ھەممىسىنى دېگۈدەك ئىگىدارچىلىقىنى قولىغا كىرگۈزۈۋالغان خىتاينىڭ ئامېرىكىغا ماگنىت ئېكسپورت قىلىشقا مەجبۇر ئىكەنلىكىنى، ئەگەر بەرمىسە %200 تاموژنا بېجى ياكى شۇنىڭغا ئوخشاش بىر تەدبىر قوللىنىشقا مەجبۇر بولىدىغانلىقىنى تەكىتلىگەن.

تىرامپ ماگنىت ساھەسىدە خىتايغا قارشى كۈچىنى زورايتىۋاتقانلىقىنى ئەسكەرتىپ: «ناھايىتى قىسقا ۋاقىت ئىچىدە كۆپ مىقداردا ماگنىتقا ئىگە بولىمىز» دېگەن.

تەييارلىغۇچى: ئى. ئۆتكۈر