11 دۆلەت مانېۋىر ئۆتكۈزۈۋاتقاندا خىتاي ۋە رۇسىيەمۇ ئورتاق مانېۋىر ئۆتكۈزدى

رۇسىيە ۋە خىتاي تۇنجى قېتىم ئاسىيا تىنچ ئوكيان رايونىدا ئورتاق ھەربىي مانېۋىر ئۆتكۈزگەن بولۇپ، ئوخشاش ۋاقىتتا ئامېرىكا قاتارلىق 11 دۆلەتنىڭ قاتنىشىشى بىلەن ھىندونېزىيەدە ئۆتكۈزۈلگەن ھەربىي مانېۋىر دىققەت قوزغىدى.

رۇسىيە تىنچ ئوكيان فىلوتىدىن ئېلان قىلىنغان يازما باياناتتا، رۇسىيە سۇ ئاستى پاراخوتلىرىنىڭ رايوندىكى قاراۋۇللۇق پائالىيەتلىرىنى ئاۋغۇست ئېيى بېشىدا باشلىغانلىقى بىلدۈرۈلدى.

باياناتتا يەنە قاراۋۇللۇق ۋەزىپىلىرىدىن كېيىن رۇسىيە ۋە خىتاينىڭ دېڭىز قىسىملىرى قاتناشقان «دېڭىز ئۆزئارا تەسىر-2025» ناملىق مانېۋىرنىڭ ئۆتكۈزۈلگەنلىكى بىلدۈرۈلگەن بولۇپ، رۇسىيە ۋە خىتاي سۇ ئاستى پاراخوتلىرىنىڭ تۇنجى قېتىم ياپونىيە دېڭىزى ۋە شەرقىي خىتاي دېڭىزىدا ئورتاق مانېۋىر ئۆتكۈزگەنلىكى تەكىتلەندى.

رۇسىيە ۋە خىتاي تۇنجى ئورتاق ھەربىي مانېۋىرىنى 2005-يىلى سېرىق دېڭىزدا ئەمەلگە ئاشۇرغانىدى. ئىككى تەرەپ 2012-يىلىدىن بۇيان ھەرخىل رايونلاردا مانېۋىر ئۆتكۈزۈپ كەلمەكتە.

ناتو باش كاتىپى مارك رۇتې رۇسىيە بىلەن خىتاينىڭ مۇداپىئە ساھەسىدىكى پائالىيەتلىرىنى تىلغا ئېلىپ: «رۇسىيە بىلەن خىتاي ھەربىي ئىقتىدارىنى كېڭەيتىپ، بىز بىلەن قارشىلىشىشقا تەييارلىنىۋاتىدۇ» دېدى.

ئۇ ئىككى دۆلەتنىڭ ناھايىتى تېز سۈرئەتتە قورال ئىشلەپچىقىرىشقا ئۆتكەنلىكىنى بىلدۈرۈپ، رۇسىيەنىڭ بۇ يىل ئىچىدە 1500 تانكا، 3000 ئوق ئۆتمەس ماشىنا ۋە كۆپ ساندا ئىسكەندەر راكېتاسى ئىشلەپچىقىرىشى مۇمكىنلىكىنى ئىپادىلىدى.

رۇتې خىتاينىڭ دۇنيادىكى ئەڭ چوڭ دېڭىز كۈچىگە ئىگە ئىكەنلىكىنى تەكىتلەپ: «ئۇلار بىز بىلەن ئۇزۇن مۇددەتلىك كۈرەش ۋە رىقابەتكە تەييارلىنىۋاتىدۇ» دېدى.

ھىندونېزىيەنىڭ ساھىبخانلىقىدا 25-ئاۋغۇستتا باشلانغان، ئامېرىكا باشچىلىقىدىكى 11 دۆلەتنىڭ قاتنىشىشى بىلەن 3-سېنتەبىرگىچە داۋاملىشىدىغان، قاتناشقۇچى دۆلەتلەر ئۈچۈن ھەربىي زامانىۋىلاشتۇرۇش ۋە ئىقتىدارلىرىنى تەرەققىي قىلدۇرۇش يولىدىكى مۇھىم بىر قەدەم دەپ قارالغان مەزكۇر مانىۋېرنىڭ رۇسىيە ۋە خىتاي ھەربىي سۇ ئاستى پاراخوتلىرى مانېۋىرى بىلەن ئوخشاش ۋاقىتتا ئۆتكۈزۈلۈۋاتقانلىقى دىققەت قوزغىماقتا.

تەييارلىغۇچى: ئى. ئۆتكۈر